Acts 27

Pol Sip al er Rom pi

1Pol sip al er Rom punda we djimaka ami iwa kerman kandjiye Julius wo Pol ne, kaye pai una pende kantau yei. Iwa Julius ge iwa Sisa amiye pakna molo ami una wan andret (100) kantau yei. 2Una kerman kambono dje wormaka, no sip ta pai al er pakna po er pupin. Sip pai ge dumo Adramitium una sipne. Sip ge er propins Esia dumo kerker yei al ge puno dje yei. Iwa ta kandjiye Aristarkus propins Masedonia paknato Tesalonaika moi iwa ge une no aike pupin. 3Po sip al papin. Tagika sip er dumo Sidon po pai. Ami iwa Julius wopake ye Pol awika, Pol er kal pika, yene ye noi una wo pak to awi. 4Awo kermaka Pol alla er sip al pakna pi. Pika, kam kopo kerman wo toi. Sip alla kopo to djinda dje, no er dumo Saiprus nu solwara paknato yei al ge, mopyeto pupin. 5Po nu solwara kerman pakna po propins soka Silisia ne, Pampilia ge kere, propins Lisia paknato Maira we dji ge no po pillau djipin.

6Dje mopinka ami iwa Julius kani dumo Aleksandria una sipne ta pai. Sip ge er Rom puno dje yeika une wo no dje i pakna worika er pupin. 7Er pupinka ege merke wo er pika no er koi bon dje yepin ba kam kopo kerman wo no to yem worno dje yei. Yeika no kiye kiye dje po, dumo Nindas ge manda pupin ba, kam kopo wo toika, no alla kere er dumo Krit koma to dumo Salmone ge kiwa kane molo er pupin. 8Pupinka kopo kerman to pa moika, nambis pera pera no yembe ye po dumo ta kandjiye sip wopake pane dumo we dji ge no po pillau djipin. Dumo ge ne, dumo Lasea ge soka manda manda yepill.

9Ege merke wo er pika, no kond bon dje yepin, man pai. Juda una egene kerman ta yei ge kandjiye kwa mapill ye nanambon we dji ge yei pora dji. Nu solwara kerman tonda ege manda yeika, Pol kane sip iwa kerman kambono moi al po embe dji, 10agana kabono, na kando ipon nu solwara kerman moro al pupin dal, ege ke nono boll wonda. Wal merke ke yendaka, kon bona ne, sip ge derpall yendaka, nono gopon mal paro we dji. 11Pol kandja embe dji ba ami iwa kerman ge napi. Una sip abi iwa ge ne, sip ne ge kandja djipill mal une pille i. 12Dumo mormon al ge wopake nayero. Kopo wondaka sip ge ke yenda paro. Una boskru sip al merke moi ge kane embe dji, nono er dumo Piniks po moponka, kopo kerman tonda ege nono wopake mopon we dji. Dumo Piniks ge dumo Krit yei al yemto kopo kerman nawonda al ge yei.

Kam kopo kerman woika, nu solwara kerman toi

13Kopo kerman koito woi ge, yepall ta kal pika, kopo komato wo paika kambono kani dumo Piniks bon we dji ge, kune yenda pai. Ga anka nu al wori ge alla ngujo i pla woro, dumo Krit nambis djeke sip i pera pera pi. 14Yepall ta pupinka, kam kopo alla kerman wo sip ge toi. Kopo kandjiye ge kam kopo koi to wondo kopo we dji. 15Wo toika, boskru kambono ge kane, er yem bon dje yei ba kopo dallmal woika, no bon dje yepin ge alla kerpin, kopo wo sip to wori kond ge pupin. 16Kod aulaul pupinka, dumo kembis ke ta kandjiye Kaunda we dji ge no manda pupinka kopo woi ge alla yepall ta nawoi. Nawoika, bot kembis ka to wori are ngundjo iwpin bot ge alla yembe ye i manda worpinka, boskru i pla woro pagle, kaye to dongall ye pagi. 17Ye kere sip derpall ye djinda dje, ka baklain pende i sip menameto woro pagle, sip dambe yemyem ka baklain i pla woro, kolo dongall ye pagi. Dumo Aprika manda po, sip ku okup megle djinda dje kane, sel kolo pagi ge i kal wormaka, kam kopo wo toika kiwa er pupin. 18Po papin. Kam kumaike kana, kopo kerman wo pa moika, nu to pa moika, sip to derpall yemboll dje yepill, sip imb ye er kal nu al po djinda dje boskru konbona i pup to nu al wori. 19Wormaka kopo wo pa moika, tagika, boskru kambono sip kogo wal yei ge yenekne aglene al i pup to nu al wori. 20Wormaka ege merke wo er pika, armina pika kupa kerman to pa pika, olpa nakanpin, kam kandjip ta nakanpin. Kopo kerman wo pa pika, no kaima gopon mal embe pupin.

21Ege merke wo er pika una moi ge kwa ta nanoi, koll toika, Pol aglo molo embe dji, iwa kabono! Na dumo Krit kere er nambon we djill ge ye napi. Pillmaka, wal ye ke yei ge nayeika, wal merke er take dje pi ge napika. 22Napika ba ye ke napiye. Sip ge derpall yenda ba, nono boll mormon ge nagopon. 23God na dje i iwa ge, yene kogoye na yendo iwa ge, une imina pika tau agelo ta dje wori, wo na pall al aglo molo 24embe dji, Pol, ni kand nagole! Ni Sisar moro al puno dje yenden ge kaima po pillau djimbenka une kot piya. Ni kamang yen al ge pille, God ye wordaka una porapora ni boll aike mor ge nagoye we dji. 25Tau agelo kandja embe dji ge, ye kand nagolme! Une kandja dji mal ge kaima panda dje na pro. 26Nagopon ba sip ge po dumo tambye ta to ke yenda we dji.

Sip er nambis djeke manda woi

27Djika ege 14-pela wo er pika, no nu Mediterenian we dji ta moi al mopinka kopo wo toika kond kiwa pupin. Imina pakna 12-oklok mal embe yeika, boskru kambono pi dumo makimb ta yei al manda wopin dje pi. 28Pille, nu solwara mur moro mo man ne dje pille, ka baklain i kal woro kani, ka momo yei ge poti (40) mita dje kani. Ege tuge ta er pika, ka alla i kal woro kani, momo yei ge teti (30) mita. 29Kambono kane kand golo, sip ola dje po ku al to derpall yenda paika, ga sip po djinda dje, sip mopyeto yei al po anka 4-pela ka to pagle, nu al wori. Woro kere, kam ola dje tagdaba dje kamang yei. 30Boskru sip kere seke bon dje pille, bot kembis yei ge alla i kal woro, kende kul embe dji, no sip gume al po anka pende ka to pagle nu al worbon we dji. 31Dji ba Pol po ami iwa kerman ne, ami una moi al embe dji, ga sip kere seke er po dji dal, ye makimb al po moye ge kune nayenda we dji. 32Djika boskru seke er bot kembis al po djine dje, ami ga po kaye kelip tomaka, bot yage kal nu al toi.

33Kam tage au djino dje yeika, Pol una moi al embe dji, ege 14-pela wo er pika ye kamallne ngujo kwa nanoi ge, ye ipon kwa nome! 34Pir mo? Ye kwa i nane ge ye yembene alla pandaka, ye porapora nagoye. Ye ngambalne ene taimanta er take dje napunda we dji. 35Bret ta yei ge Pol amblo i God wopake we dje awo, buko dje noi. 36Noika una porapora kanmaka, yenekne kubene ge arngan yeika, alla kwa i noi. 37Nono una sip al mopin ge tu andret sepenti sikis (276) mopin. 38Kambono kwa no kere, sip u djinda dje pille, plawa bek yei ge i pup to nu al wori.

Sip ge derpall yei

39Kam tagika nambis manda wopinka, boskru dumo ge kanpol natoi. Ba dumo ta kani ge nu er pakna pi al nambis dumo wopake ta yei. Boskru dumo wopake yei al ge manda po pambon dje pi. 40Pille anka sip amblo gi dje pagi ge, kaye kelip to nu al woro keri. Sip stiaye ka to dongall ye pagi ge, alla piska to wori. Sel i pla woro takmaka, kopo wo toika, nambis djeke bon dje kani al ge er pi. 41Er pi ba sip gume po okup al bolo gi dje pai. Paika, kopo woika, nu pebul dje woika sip mopye al to derpall yei. 42Yeika kaye pai una nu kapill to seke er po djine dje pille, ami una to gopon we dji. 43Dji ba, ami iwa kerman ge Pol to golo djine dje man dji, ye nu kapill to kaninj una plo dje nu kapill to er nambis yenda al pume! dji. 44Ye nu kapill to nakaninj una ge iko plang mo, sip iko tuge ta yenda ge ye amblo i nu kapill to er nambis djeke pume! dji. Dji mal ge nono porapora er orko wo nambis djeke wopin.